ضابط شرطة لـ"صباحي": "الناس زهقت من تجار الكلام ومرتزقة الثورات"

استنكر الرائد هشام صالح بقوات الأمن المركزي، تصريحات المرشح الرئاسي السابق حمدين صباحي، في برنامج "العاشرة مساء"، أمس الخميس، عن الأحوال الاقتصادية والسياسية في مصر.
وقال صالح في رسالة عبر صفحته الرسمية بموقع التواصل الاجتماعي: "رسالة إلى حمدين صباحي عقب إدلاء الأخير بعدة تصريحات مثيرة للجدل والتي كان من بينها دعوته للمصالحة مع عناصر التنظيم الإرهابي الإخوان وإلى نص الرسالة والتي قال فيها الرائد هشام اتفرجت على أجزاء من حلقتك والحقيقة كده أنا هعقب على شوية حاجات بسيطة سمعتك بتتكلم عن فض رابعة وإنه مش عاجب جنابك واستخدمت العبارة الساذجة الدارجة بتاعت إن الدم كله حرام وإنك اتوجعت من اللي ماتوا في فض رابعة وكنت تقصد الإخوان.. انت حتى مذكرتش إن أول شهداء في فض رابعة كانوا 2 ضباط.. منهم واحد كان لسة بينزل من المدرعة وأول ما حط رجله الأرض جاتله رصاصة قناصة في رأسه واستشهد في الحال وده كان الشهيد صاحبي شادي مجدي اللي علمني أنا وضباط كتير يعني إيه رجولة وتضحية.. ولما كنت معاه في جبل الحلال ويلاقيني متضايق إننا مش بننزل إجازات كان بيهون علينا بضحكته وكلامه إننا لازم نستحمل.. انت بتطلب مننا إيه يا عم يا مناضل انت؟.

وأضاف صالح: "المطلوب إيه اللي يحصل وانت بتواجه اعتصام مسلح استخدم أكتر الأسلحة عنفا..؟ هل لما القوات تلاقي 5 ضباط ماتوا جنبهم في أول نص ساعة واللي بدأ من الإخوان المسلحين المفروض يدخلوا يدوهم جاتوه وسفن آب زي مانت عايز.. اللي ميعرفش يقول عدس يا بيه.. وانت مبتفهمش في الأمن أصلا يبقى متتكلمش لأن أنا عمري ماشفتك حيادي انت طول الوقت متحيز لأفكارك المتناقضة اللي واضحة لينا كلنا وواضحة ليا كمواطن قبل ماكون ضابط..

انت فشلت في كل حاجة تقريبا واشطر واحد تعلق فشلك على اللي حواليك وعلينا أول ناس.. دايما فكرة المؤامرة مسيطرة عليك.. شفت صورك ومقابلاتك مع قيادات وكوادر وشباب الإخوان أكتر من عدد الأصوات اللي انت خدتها في انتخابات الرئاسة.. شفت إنك كنت بتقول إنك بتعارض نظام الرئيس الأسبق مبارك ولقيتك بترحب بتولي نجله جمال رغم انك كنت ضد التوريث.. عمري ما شفتك بتتكلم عن دم عسكري مصري إلا فتات المرات على استحياء وكإنك متبني فكرة وحيدة تدافع بيها عن أفكارك السمجة بس.. اتكلمت على اللي بتسميهم شباب ثورة وإنهم معتقلين وزوار فجر وجو قديم أوي انت مش قادر تتحرر منه أو تفكر بره الصندوق.. دافعت عنهم وجهلت إن في 750 شهيدا و13000 مصاب نصهم عنده عاهات مستديمة من زمايلي ولا عمرك اتكلمت عنهم ولا احنا مستنيين كلامك عنهم لأنه ميعنيناش وميساويش عندنا 3 سحتوت لأن مهما أقول عمرك ما هتفهم يعني ايه الفرق بين الواجب والتضحية.

وتابع صالح: عمرك ما هتعرف ياللي بتتكلم عن المصالحة إن في ضابط هو الوحيد في فض النهضه الشهيد محمد عبدالعزيز كان داخل أحد الخيم ولقي أسره أخوانية مكونة من أب وأم وولادهم وكان ممكن يصفيهم كلهم لو حب.. لكن إنسانيته اللي انت متعرفهاش منعته واداهم الأمان يخرجوا ومسافة ما اداهم ضهره الراجل الإخواني طلع سلاحه وضرب الضابط اللي نال الشهادة.. هو ده العهد اللي انت بتتكلم عليه.. انت متعرفش يعني إيه تدفن زميلك وصاحب عمرك وترجع تشتغل وتلبس التيشيرت بتاعه وتنزل بيه مأموريات وبردو تستشهد زيه.. ده الشهيد محمد السواح اللي بكلمك عليه واللي خد التيشيرت بتاع الشهيد أحمد حجازي بعد ما دفنه.. طبعا انت مش هتركز في اللي بقوله لأنه عمره ما هيوصلك وده لأسباب كتير يمكن معانيها مفقودة عندك في وسط مؤتمراتك وبدلك وكرافتاتك وشعرك.. انا عمري ماهنكر إن في سلبيات واوعى تفتكر اني بطبل لحد.. لكن أنا بدافع عن مهنتي اللي انت متعرفش عنها أي حاجة.. انت فاكر نفسك إنك لوحدك اللي مناضل.. لااااا تبقى واهم وعايز تبص فالمرايا.. اوعى تنسى إن في ضباط شرطة وأنا كنت واحد منهم وقفنا ضد الإخوان ونظامهم الفاسد.. هتفنا بعلو الصوت ضد الظلم وانحازنا للشعب ومخوفناش.. في الوقت اللي انت كنت بتماين حساباتك ومواءاماتك..اوعى تكون فاكر أن انت لوحدك المثقف لااااا تعالى أوريك كام ضابط معاه دكتوراه أو ماجستير وكان بيذاكر في الشارع عشان معندوش وقت يذاكر فيه إلا بعد أو قبل خدمته.. تعالى أوريك ضابط اسمه طارق عبدالوهاب فقد ايديه الاتنين وهو بيتعامل مع قنبلة السنة اللي فاتت واهو عايش من غير إيدين عشان انت وافكارك تقعد ترازي فينا وتقرفنا وانت أصلا ملكش أي إنجاز عالارض إلا الكلام وابتسامتك المملة.. تعالى أوريك لواءات أكبر منك قاعدين في الشارع بالعشرين ساعة.. واوعى تفتكر إني بطبل بردو لأن أنا اكتر واحد ضد الاعتماد عالعنصر البشري .. مسمعتكش بتتكلم عن اللي قتلوا زمايلي ولحد دلوقتي فالسجون بيتحاكموا.. انت اتكلمت بس عن مصلحتك واللي زي أفكارك.. انت دافعت عن اللي حرضوا على قتلنا وخربوا في الشوارع وبتطالب الدوله تفرج عنهم.

واستطرد رسالته بقوله: "سمعتك بتقول إن الجيش بيقوم بدور غير دوره.. لولا الجيش اللي مش عاجبك كان زمانك بايع دهب بيتك وشاري بندقيه آلي وواقف تحت بيتك في أحمد عرابي.. أكتر مشاريع ناجحة بتطلع من إيد الجيش.. وكتر خيره إنه شايل حمل وقرف مؤسسات تانية."

وأضاف صالح: "انت متعرفش حاجة عننا يبقى متتكلمش إلا فاللي يخصك....ونصيحة من واحد سنه نص سنك.. حاول تغير من عباراتك وأسلوبك ونغمة إحساسك بالفقير لأن انت متعرفش عنهم حاجة زينا...احنا اللي بنتعامل معاهم في الشارع أكتر منك وعلى أد ما بنقدر بنتعامل أنا وكتير بما يرضي ربنا أو ضميرنا حتى في عز السلبيات اللي موجودة عندنا أو بعض التجاوزات الفردية اللي بتحصل واللي مقدرش أنكرها واللي رافضها انا وكتير وبدليل أن ضباط الأمن الوطني اللي اتهمو بتعذيب محامي إخواني محبوسين بحكم نهائي زيهم زي أي ضابط اتقدم للنيابه واتحبس في واقعة مشابهة وده حصل الأيام اللي فاتت كتير... بس طبعا عشان الموضوع مش على هواك فانت مش هتتكلم فيه وهتعمل هندي".

وابع رسالته بقوله: "أخيرا وعشان متقولش اني مزقوق عليك لا سمح الله...لو انت متعرفنيش أو مشوفتنيش قبل كده ممكن تدخل عاليوتيوب أو جوجل وانت تعرف أنا بكلمك في إيه وانا مش بهري معاك في كلام مالوش لازمة أو باحث عن شو.. لا أنا الحمدلله كنت عالارض ووقفت وساهمت في 30 يونيو وكنت بفضل الله أول متحدث رسمي منتخب من ضباط الشرطة في أول انتخابات على مستوى وزارة الداخلية في تاريخها والحمدلله فزت باكتساح ولعلمك كمان انا الحمدلله معايا 3 دبلومات وماجستير من أكبر الكليات وشغال في الشارع مش قاعد على مكتب.. بس الحمدلله أنا عارف معنى الانتماء لوظيفتي وبخاف عليها من حد زيك كل همه يطلعنا سفاحين وجبابرة وخلاص.. ويجهل أي تضحيات أو بطولات لمجرد الدفاع عن أفكاره الغامقة السطحية".
واختتم رسالته بقوله": "وهات ودنك.. كلام في سرك.. الناس زهقت من تجار الكلام ومرتزقة الثورات.. ربنا يكفيك شرهم".

المصدر: albawabhnews